Ecc 10 | NdeIBE | STEP | Njengoba izimpukane ezifele phakathi kwamagcobo ziwenza anuke kubi, kunjalo lobuwula obuncinyane bugabhela ukuhlakanipha lodumo.

Ecclesiastes 10

1 Njengoba izimpukane ezifele phakathi kwamagcobo ziwenza anuke kubi, kunjalo lobuwula obuncinyane bugabhela ukuhlakanipha lodumo.

2 Inhliziyo yolungileyo igebela ekulungeni, kodwa inhliziyo yesiwula igebela ebubini.

3 Loba ehamba nje emgwaqweni oyisiwula kalangqondo, utshengisa loba ngubani ubuphukuphuku bakhe.

4 Aluba umbusi ekuthukuthelela, ungasuki esikhundleni sakho; ukuthobeka kungathoba umonakalo obungaba khona.

5 Bukhona ububi esengibubonile ngaphansi kwelanga, kuliphutha elenziwa ngumbusi:

6 Iziwula ziphakanyiselwa ezikhundleni ezinengi eziphezulu, kodwa abanothileyo belezikhundla eziphansi.

7 Sengibone izichaka zigade amabhiza, kuthi amakhosana ahambe ngezinyawo njengezichaka.

8 Lowo ogebha umgodi angawela kuwo; odiliza umduli angalunywa yinyoka.

9 Oqhekeza amatshe angalinyazwa yiwo; obanda izinkuni angaba sengozini yazo.

10 Aluba ihloka libuthundu ubukhali balo bungalolwanga, kudinga ukuvinyelela kodwa ubungcitshi buyaphumelelisa.

11 Uma inyoka ihle ilume ingakalunjwa, umlumbi kaselanzuzo.

12 Amazwi aphuma emlonyeni wesihlakaniphi amnandi, kodwa isiwula sichithwa yizindebe zaso.

13 Ekuqaleni amazwi aso ayibuwula; ekucineni aseyikuwumana okubi –

14 njalo isiwula sanda ngamazwi. Kakho okwaziyo okuzayo – ngubani ongamazisa okuzakwenzakala ngemva kwakhe na?

15 Umtshikatshika wesiwula uyasidinisa; kasiyazi indlela eya edolobheni.

16 Maye kuwe, wena lizwe onkosi yalo yayiyisichaka, amakhosana akho azitika ngamadili ekuseni.

17 Ubusisiwe wena, wena lizwe onkosi yalo izalwa esikhosini – amakhosana alo adla ngezikhathi eziqondileyo – edlela ukuqina hatshi ukudakwa.

18 Nxa indoda ilivila izintungo ziyabhensa; nxa izandla zayo ziyekethisa indlu iyavuza.

19 Idili lenzelwa ukujabula, lewayini lenza impilo ibe mnandi, kodwa imali yiyo impendulo yakho konke.

20 Ungayithuki inkosi lasemicabangweni yakho, loba uqalekise abanothileyo loba usendlini yakho yokulala, ngoba mhlawumbe inyoni yasemoyeni ingawathwala amazwi akho, loba inyoni ephaphayo ingayabika okutshoyo.